ჩვენ შესახებ

Tech
გერმანიის ქართულმა სათვისტომომ ილიას სახელმწიფო უნივერსიტეტის ფაბლაბთან პარტნიორობით, გერმანიის საერთაშორისო თანამშრომლობის საზოგადოება/ საერთაშორისო მიგრაციისა და განვითარების ცენტრი (GIZ/CIM)-ის ფინანსური მხარდაჭერით დაიწყო პროექტი “TechGirls Georgia”. TechGirls Georgia პროექტის მიზანია ციფრული ტექნოლოგიების სფეროში ქალთა წარმომადგენლობის გაზრდა აღნიშნული მიზნის მისაღწევად, პროექტის ფარგლებში შეირჩევიან სკოლის მოსწავლე გოგოები (VIII - XI კლასები), რომლებიც მომავალი პროფესიის არჩევის ეტაპზე იმყოფებიან. შერჩეულ მონაწილეებს შესაძლებლობა ექნებათ, შეისწავლონ პროგრამირების/კოდის წერის საფუძვლები, დააარსონ ტექ-გოგოების კლუბი და მონაწილეობა მიიღონ საინფორმაციო-საგანმანათლებლო ონლაინ პლატფორმის შექმნაში. პროექტი ასევე ითვალისწინებს მენტორინგის პროგრამას და ციფრული ტექნოლოგიების სფეროში არსებული მრავალმხრივი შესაძლებლობების და პერსპექტივების გაცნობას.
231289274_4210568055700961_4897969868459168373_n

ორგანიზატორები

თამარ შაშიაშვილი

“ყველა იმ პროექტს შორის, რომელთა განხორციელებაშიც ვყოფილვარ ჩართული, ტექ-გოგოების პროექტი ჩემთვის განსაკუთრებულად მნიშვნელოვანია მრავალი მიზეზით. პირველ რიგში იმის გამო, რომ პროექტში თბილისთან ერთად ჩემი მუნიციპალიტეტი, ახმეტაა, ჩართული. ამასთან, მიმაჩნია, რომ თანამედროვე ტექნოლოგიებისა და ინოვაციების გარეშე წარმოუდგენელია სოციალური კეთილდღეობის გაუმჯობესება და ეკონომიკური პროგრესი. იმედი მაქვს, გოგოები სამომავლო პროფესიად Tech-სფეროს აირჩევენ და თავიანთი გამოგონებებითა და იდეებით გადაჭრიან კონკრეტულ პრობლემებს, მრავალფეროვანსა და უსაფრთხოს გახდიან ჩვენს ყოფა-ცხოვრებას.”

ნინა ჯანაშია

“ციფრული ტექნოლოგიები ჩვენი ყოველდღიურობის სულ უფრო მნიშვნელოვანი ნაწილის ხდება, მაგრამ ქალები ჯერ კიდევ ნაკლებად არიან წარმოდგენილნი ამ სფეროში. მჯერა, რომ ციფრულ ტრანსფორმაციას თან უნდა ახლდეს საზოგადოების გარდაქმნაც. ქალების წარმომადგენლობის გაზრდა ტექნოლოგიების სფეროში მნიშვნელოვანია არა მხოლოდ ამ სფეროში არსებული ბრწყინვალე კარიერული შესაძლებლობების გამო, არამედ მთლიანად ტექ-ინდუსტრიაში ინოვაციებისა და საზოგადოების საჭიროებების უკეთ დასაკმაყოფილებლად. ტექ-გოგოების პროექტი და ტექ-გოგოების კლუბები სთავაზობს დაინტერესებულ სკოლის მოსწავლე გოგოებს განათლების, ნეთვორქინგის და მენტორინგის შესაძლებლობებს"

ირინე ჩიხლაძე

"ტექ-გოგოების პროექტი ჩემთვის ერთ-ერთი ყველაზე საამაყოა, რადგან რამდენიმე გამოწვევას ერთდროულად პასუხობს: ქალების გაძლიერება, ტექნოლოგიური პროფესიების პოპულარიზაცია და განათლება. იურისტი ვარ, მაგრამ კარგად მაქვს გაცნობიერებული ტექნოლოგიების მნიშვნელობა და როლი თანამედროვე მსოფლიოში. მიუხედავად ამ მიმართულების კარიერული პერსპექტივისა და მაღალშემოსავლიანობისა, STEM-პროფესიას ჯერ კიდევ ცოტა ქალი ირჩევს საქართველოში, ამის მიზეზი ხშირად სტერეოპიტული მიდგომებია. ტექ-გოგოების მიზანი, სწორედ, სტერეოტიპების მსხვრევა და სკოლის მოსწავლე გოგოებისთვის ისეთი საბაზისო ცოდნის მიცემაა, რომელიც მათ STEM პროფესიის არჩევაში დაეხმარება. ‌არ არსებობს გენდერული ნიშნით დაყოფილი პროფესიული უნარები, ყველას შეგვიძლია ის ვაკეთოთ რაც მოგწონს და სადაც უფრო მეტ განვითარების შანსს ვხედავთ. წარმატებას ვუსურვებ ყველა ჩვენს მონაწილეს!"

Back to top